Праграма Аляксандра Лагвінца

Дэпутат – гэта найперш палітык, задача якога ствараць законы і правілы, па якіх мы жывем. Гэта той чалавек, якога Вы “наймаеце” дзеля таго, каб у краіне дзейнічалі законы, якія ахоўвалі б інтарэсы кожнага грамадзяніна і былі роўныя для ўсіх.

Дэпутат таксама павінен быць у цэнтры грамадскага жыцця сваёй акругі, мець сетку грамадскіх прыёмных у зручных для грамадзян месцах, гарачую тэлефонную лінію, аказваць бясплатныя кансультацыі па неадкладных пытаннях.

Наша Беларусь – гэта краіна з вялікімі магчымасцямі і багатай еўрапейскай гісторыяй. Я веру ў тое, што ў нашых сілах зрабіць Беларусь моцнай і квітнеючай. Зрабіць гэта могуць толькі адказныя, рашучыя, прафесійна падрыхтаваныя палітыкі, а не маўклівыя статысты.

Мы, Беларусы, – працавіты, сумленны і таленавіты народ. Але нашай стваральнай працы перашкаджаюць адміністрацыйныя бар’еры: беларускае падатковае заканадаўства – гэта невыносны цяжар на плячах любога прадпрыемства; доўгая і дарагая працэдура рэгістрацыі і ліцэнзіявання перашкаджае развіццю сваёй Справы для кожнага. Я выступаю за тое, каб мы плацілі адзін-два фіксаваныя падаткі, як у цывілізаваных краінах, і самі вырашалі, на што выдаткоўваць заробленыя грошы!

Я прашу Вашай падтрымкі, каб, прафесійна і сумленна працуючы ў парламенце, змяніць сітуацыю ў краіне на карысць кожнага з Вас і ўсіх грамадзян Беларусі.

Вось галоўныя прыярытэты маёй дзейнасці ў парламенце:

• утульнасць нашага жыцця і сямейны дабрабыт;
• еўрапейская адукацыя і будучыня для нашых дзяцей;
• высокі прэстыж нашай краіны ў Еўропе і свеце.

1. Утульнасць нашага жыцця – гэта чыстыя і добраўпарадкаваныя дамы і двары, хуткі і даступны транспарт, паліклінікі, цэнтры сацыяльнай дапамогі, фізкультурна-аздараўленчыя цэнтры, басейны, крамы, банкі, кампутарныя цэнтры.

Каб дасягнуть гэтага, лічу неабходным:
– наладзіць працу Камітэтаў тэрытарыяльнага грамадскага самакіравання. Як дэпутат, я буду ініцыяваць іх стварэнне. Разам з дэпутатамі гэтыя камітэты будуць кантраляваць мясцовыя ўлады адносна ўсіх жыццёва важных праблем нашых мікрараёнаў: Сухарава, Захад, Чырвоны Бор, Кунцаўшчына.
– зменшыць падаткі для прыватных перавозчыкаў, што прывядзе да зніжэння цэнаў на маршрутныя таксі;
– пабудаваць шматузроўневыя паркінгі і гаражы з тым, каб зменшыць колькасць аўтамабіляў, прыпаркаваных у нашых дварах.

Як дэпутат я буду першачаргова дамагацца, каб
адмяніць занадта дарагі маршрут аўтобуса №523, а аўтобус №26 павінен з большай рэгулярнасцю руху злучаць наша Сухарава з рынкам “Ждановічы” па звычайным тарыфе;
падоўжыць маршрут аўтобуса №77 ад яго цяперашняга канцавога прыпынку “Вуліца Адзінцова” па вуліцах Садовая і Вышэлескага да цэнтру былой вёскі Кунцаўшчына з канцавым пунктам на перакрыжаванні вуліц Вышэлескага і Брыкета.
Падоўжыць тралейбусныя маршруты №9, 13, 44 да д/с Сухарава (Лабанка-Сухараўская) з далейшым працягам да д/с Сухарава-6.

Пабудаваць сямейны дабрабыт з любімай працай і годным заробкам для кожнага можна толькі на базе рынкавай эканомікі з яснымі і роўнымі для ўсіх законамі.

Я выступаю за ўнясенне зменаў ў заканадаўства пра замежныя інвестыцыі, за зніжэнне падатковых ставак для інвестараў, за спрыянне ўвозу найноўшых тэхналогіяў. Бо перадавая вытворчасць – гэта добрыя заробкі ды годнае жыццё для нас і нашых дзяцей, гэта ўпэўненая будучыня для ўсёй краіны.

Каб спрыяць сям’і, дзяржава павінна падвысіць памеры гарантаванай дапамогі шматдзетным сем’ям, няпоўным сем’ям, сем’ям з дзецьмі-інвалідамі, незалежна ад памераў даходаў бацькоў.

2. Еўрапейская адукацыя для нашых дзяцей.

Адукацыя і будучыня нашых дзяцей узаемазалежныя. Упэўнены, што не ў інтарэсах беларускага грамадства неабгрунтаванае закрыццё лепшых і самых адкрытых да кантактаў навучальных установаў, Беларускага гуманітарнага ліцэю імя Я.Коласа і Еўрапейскага гуманітарнага універсітэта.

Сучасная якасная адукацыя азначае веданне інфармацыйных тэхналогіяў, замежных моваў і развіццё здольнасцяў да наватарства. Гэта забяспечваецца ў тым ліку і праз кантакты і абмены з прадстаўнікамі розных культур і традыцыяў.

Пачынаць трэба са школы! Я хачу і магу дапамагчы кожнай школе, кожнай гімназіі акругі знайсці замежнага партнёра – школу, гімназію ці ліцэй Польшчы, Францыі, Германіі, Вялікабрытаніі. Нашыя дзеці і іх настаўнікі атрымаюць шанс раўняцца на лепшыя ўзоры!

Як дэпутат я буду першачаргова дамагацца, каб
наша дзяржава забяспечвала сапраўды якаснае харчаванне ў садках і школах;
малады спецыяліст па сканчэнні ВНУ меў права выбару: карыстацца падтрымкай дзяржавы або самому шукаць сабе працу.

3. Высокі прэстыж краіны ў Еўропе і свеце.

Мы павінны адкрыць нашу краіну як на ўсход, так і на захад. А таму адной з галоўных задачаў новага парламента павінна стаць наладжванне добрых сяброўскіх стасункаў з нашымі заходнімі суседзямі.

Мой вопыт вучобы і працы ў розных краінах дае мне падставы сцвярджаць: нашыя заходнія суседзі хочуць сябраваць і быць нашымі добрымі партнёрамі.

Перакананы, што ў беларускім нацыянальным інтарэсе збліжацца з аб’яднанай Еўропай, дасягнуць еўрапейскіх стандартаў узроўню жыцця, дэмакратыі, павагі да правоў чалавека. Як дэпутат я буду ініцыяваць стварэнне Цэнтраў еўрапейскай інфармацыі для жыхароў акругі.