Вынікі выбараў

Коратка пра вынікі. Мне напісалі 5% (654 чалавекі!), хаця мы за мяне толькі подпісаў сабралі 951!!!

Але гэта не азначае, што я шкадую, што ўвязаўся ў кампанію мясцовых выбараў. Мой удзел быў важны хаця б для таго, каб паказаць людзям, што мы ёсць і што нас шмат. Гл., калі ласка, маю скаргу ў ЦВК, якім чынам адбываліся "выбары".

З павагай, Аляксандр Лагвінец

P.S. Я паступова буду вывешваць на сайце намаляваныя вынікі па кожным з участкаў са здымкамі ды спісамі тых, хто маляваў.

P.S.-2 Коратка пра вынікі маёй кампаніі:

• 292 подпісы сабраныя, каб вылучыць 5 чалавек (Акопаў, Гуляеў, Лагвінец, Муліна, Пыльчанка) ад грамадзянаў Сухарава ў склад акруговае выбарчае камісіі пры вымаганых 30 подпісах за аднаго вылучэнца ў склад акр. камісіі. У Менгарвыканкаме няводнага зь іх ня ўлучылі, нават парушылі свой жа закон аб зваротах грамадзянаў, бо нікому пісьмова не адказалі, хаця мы прасілі ў выпадку няўлучэньня пісьмова абгрунтаваць прычыны такога рашэньня.
• 951 подпіс за маё вылучэньне ў якасьці кандыдата ў дэпутаты (асабіста я сабраў 168 подпісаў).
• 117 подпісаў сабраныя, каб вылучыць 9 чалавек ад грамадзянаў Сухарава ў склад участковых выбарчых камісіяў (усіх участкаў па акрузе – 11) пры вымаганых 10 подпісах за аднаго вылучэнца ў склад уч. камісіі. У Адміністрацыі Фрузенскага раёна няводнага зь іх ня ўлучылі, нават парушылі свой жа закон аб зваротах грамадзянаў, бо нікому пісьмова не адказалі, хаця мы прасілі ў выпадку няўлучэньня пісьмова абгрунтаваць прычыны такога рашэньня. Больш за тое, рэжым паказаў, наколькі гэта для яго балючае пытаньне, паколькі намаганьнямі майго былога аднакурсьніка Козела (нам. кір. адміністрацыі Фр. раёну) на вылучэнцаў у склад камісіяў на месцах іхнае працы пачаўся ціск, 2 чалавекі пад пагрозай страты працы мусілі пісьмова адмовіцца ад удзелу ва ўч. камісіях.
• заявы ў пракуратуру, ЦВК, Менгарвыканкам пра відавочнае адмысловае заніжэньне колькасьці выбарцаў у Фрунзенскім раёне г. Мінска.
• 2280 (!) подпісаў сабраных пад зваротам да менскага вэртыкальшчыка Паўлава з пытаннямі пра аб’екты сацыяльна-побытавага прызначэньня ў Сухараве на падставе цалкам праваленай праграмы Менгарвыкаму, калі аніводны з заплянаваных аб’ектаў у Сухараве дагэтуль не пабудаваны (гл. http://zakon2006.by.ru/locpart/mesd3057.shtm).
• арганізацыя сустрэчы Аляксандра Мілінкевіча з жыхарамі м-на Сухарава 4 студзеня 2007 г.
• кампаніяй “ад дзьвераў да дзьвераў” ахоплена 8500 з 14500 кватэраў у акрузе.
• назіраньне было арганізаванае на ўсіх 11 участках акругі (4 давераныя асобы, 16 назіральнікаў + сам кандыдат)