Чыноўнікі не далі згоды на сустрэчу з Мілінкевічам
Арганізатары сустрэчы лідэра Руху "За Свабоду” Аляксандра Мілінкевіча з жыхарамі Барысава ў СШ №23 на сваю заяўку ў райвыканкам атрымалі адмову. Аднак, сустрэчы адбудуцца ў іншым фармаце.
Аўтар адмовы – кіраўнічка ідэалягічнага адзьдзелу Барысаўскага райвыканкаму Людзьміла Гарнак. Забарону падпісаў старшыня Барысаўскага райвыканкаму Васіль Дылюк. Афіцыйная прычына адмовы − “неадпаведнасць пададзеных дакументаў”.
− Падобная фармулёўка выкарыстоўваецца мясцовымі чыноўнікамі не першы раз, але ніколі не тлумачыцца, − кажа актывіст Сяргей Салаш. Па яго словах, барысаўскі ідэолаг у сваім лісце таксама дапусціла шэраг юрыдычных памылак і недакладнасцяў, што можа быць падставай для судовага разбіральніцтва і прызнання забароны на правядзенне сходу неправамерным.
Тым не менш, лідэр Руху “За Свабоду” правядзе шэраг сустрэч з барысаўчанамі. Папярэдні расклад такі:
• 17-00 – сустрэча з журналістамі ў рэдакцыі газэты “Барысаўскія навіны”;
• 18-00 – размова з жыхарамі пасьля заканчэньня сустрэчы з журналістамі каля рэдакцыі (вул.8 Сакавіка, 16);
• 19-00 – сустрэча з дэмакратычнымі актывістамі (пра месца можна даведацца па тэлефоне 6201897).
Паводле barysau.belarda.org